Velkominn á námskeiðið Rafræni aðstoðarkennarinn.
Fyrir hverja er námskeiðið?
Þetta námskeið er fyrst og fremst hugsað
sem stuðnings – og upprifjunarnámskeið fyrir þá nemendur sem eru að hefja nám aftur,
jafnvel eftir langt hlé. Aðrir sem vilja rifja upp fyrri kunnáttu geta líka nýtt
sér þetta námskeið.
Tilurð þessa námskeiðs
Höfundar verkefnisins fundu fyrir aukinni þörf nemenda á upprifjun í dönsku og hófust handa við að safna saman á einn stað
efni sem þegar er til á netinu um dönsku og danskt mál auk þess sem nýtt efni var
samið.Tók verkefnið á sig form námskeiðs sem var algerlega á sjálfsnámsformi og
fór fram á veraldarvefnum.
Styrkur fékkst til þessa verkefnis
bæði frá Nordplus og Menntamálaráðuneytinu og er þessum aðilum færðar bestu þakkir
fyrir veittan stuðning.
Hvernig fer námskeiðið fram?
Um er að ræða sjálfsnám sem fer að öllu leyti fram á netinu. Námskeiðsvefur þessi
er opinn öllum, þeim að kostnaðarlausu. Námsefninu er skipt upp í
lektioner (kennslustundir) sem ætlast er til að fylgt sé í ákveðinni röð
og kemur það skýrt fram.
Hvernig er hægt að byrja?
Þetta þarf að vera til staðar við upphaf námskeiðs:
-
Málfræðibókin
Sådan siger man eftir Hafdísi Ingvarsdóttur og Kirsten Friðriksdóttur.
(fæst í flestum bókabúðum).
-
Aðgangur að tölvu/neti.
Það þarf að búa til notendanafn og lykilorð
sem þarf til að komast inn í og áfram í verkefnunum. Það er gert til að nemendur
geti hætt þegar þeim hentar og haldið svo áfram þar sem frá var horfið.
Til þessa að stofna notendanafn smellið hér
eða sjáið hér til hliðar.
Annað:
-
Í öllu tungumálanámi er nauðsynlegt að styðjast
við orðabækur og mælum við með að nemendur temji sér notkun á danskri orðabók (t.d.
Politikens retskrivnings- og betydningsordbog sem fæst víða í bókabúðum) og hafi
einnig aðgang að dansk-íslenskri orðabók.
-
Dönsk –íslensk, íslensk – dönsk orðabók er
til í rafrænu formi og eru nemendur hvattir til að útvega sér aðgang að henni. Margir
skólar eru í áskrift og því er hægt að nota orðabókina þegar unnið er innan skólastofnana.
Slóðin er:
http://snara.is/vefbaekur/g.aspx?dbid=40&txt=vefbaekur
-
Til er danskur hljóðgervill sem hægt er að
sækja á http://adgangforalle.dk/ Þegar það er búið
getur tækið lesið þann texta sem hefur verið valinn og búið er að yfirskyggja.
Þetta getur verið texti á heimasíðu eða í skjali en þetta á eingöngu við um texta
á dönsku. Um leið og ýtt er á þríhyrninginn les tækið.
Við hvetjum ykkur til að byrja strax og lesið vel allar leiðbeiningar.
Gangi ykkur vel.
Björg Hilmarsdóttir og Málfríður Þórarinsdóttir dönskukennarar við Háskólann í Reykjavík.